"හැඟීම් බොහෝමයක් තිබ්බට ඒවයේ උප්පත්ති මූලය බොහෝ වෙලාවට අපිම හෝ අපිට ලඟම මනස උසස් වූවෝ. ඒ වගේම ගැහැණිය හැඟීම් උත්පාදනයේ ඉහලම තැනක ඉන්නවා. මේ එතනින් එහාට ගිය හැඟීම්, වචන කරපු ලියමනක්...."

Saturday, January 30, 2010

කුමට මෙරට මැතිවරණය,ඡන්දය සහ ජනපතින්


ඡන්දය යන්න වදනකි සිත් තොසින් පිරූ
මන්ද විසල් තුටු පඬුරකි සිනහ සැරූ
පහේ එකා සිට හැත්තෑ වෙනියා තුරූ
සැරසෙති විඳින්නට ඒ රංගයෙහි අරූ

දුදනන් පෝලිමක් ඇත අත් එකතු කර
රිළවුන් පෝලිමකි එය හා සරණ වැද
බැන බැන සිටද අප මෙලෙසින් එවුන් හට
වෙන්නේ නිරුත්තර අවසන් ඵලය දුට

මම කොල, උඹ නිල්ය, තවකෙක් රඹ පැහැය
සීය දෙකෙන් බෙදි ප්‍රතිශත අතගෑය
අපියි දිනන්නේ බාළයෝ මොරගෑය
එකෙක් දිනා ඇත අනෙකුන් ලබු කෑය

තැම්බූ කඩල ඉවරයි අළුයමට කලින්
පොල්, ගල් මූඩි ඇවිදියි වෙරි බමණ මතින්
ඡන්දෙට කලින් පිම්බුණු හැම එකා වෙතින්
ඉතිරිව ඇතේ බේරෙන තෙල් මූණු පිටින්

නොදනිමි කෙසේ දිනුවෙහි ඒ සක්කරයා
පතනෙමි ඉහල යන්නට ලක් දෙරණායා
මගේ ඡන්දයත් කොයිබද ගිය සේයා
අවසන ඉතිරි වූයේ බැලු සිනෙමායා

Friday, January 29, 2010

මම ඔහේ ගියා. . .

















වීදුරු අතගගා අඬන
පන්තියේ දෙවනියා වෙන
සෙල්ලමේදී ඇඳුම් ඉරෙන
උඹ කන ගුටි. . .

කුප්පිය සෙට් උනේ නැතිව
අල වෙවීම ඉන්න
ආණඩුවට පාඩං උගන්නපු
උඹ මැරිලා ගිය හැටි. . .

වැඩ අඩු උනාම බොසාගෙනුයි
පඩි මදි උනාම ගෑණිගෙනුයි
කොල අඩු උනාම වේසිගෙනුයි
උඹ බැනුම් අහපු හැටි. . .

උඹලා තොල් හෙලෙව්වේ
රහ ගැන කියන්නද?
"නොකරන්!" කියන්නද?
මම ඔහේ ගියා. . .

Wednesday, January 27, 2010

උඹයි මායි

උඹයි මායි
අරක්කු නැහැදුව එක විතරයි
කෑලි පස්සෙන්මයි
ඉස්කෝලෙදි හැමදාමත්
කොරිඩෝවට වාරුවෙච්ච උං

උඹයි මායි
ගියා පාටි වලට
නැටුවා රෑ එළිවෙනකං
මොනවද කෑවේ
මොනවද බිව්වේ

උඹයි මායි
ආවා මූණු පොතට
ඒකෙත් වල බැස්සා. ..
නොකරපු තක්කඩිකමක්
කළුනික වගේ

උඹයි මායි
දැම්මනේ ඡන්දේ
දෙන්නම එක පිහිපාරෙන් බිම
අසරණයි උඹයි මායි
පැති දෙකක වෙලත්

Thursday, January 21, 2010

ඩ්‍රයිවර්ගේ අඳෝනාව


රියදුරු දෑතට දෙවි පිහිටයි
දිලිසෙන දේව රූප ගොඩ මැද්දෙන්
රතු පාටට කොටලා
තිබ්බට. . .

හෙමින් ගියත්
හයියේ ගියත්
බත් පත ගන්න නැවැත්තුවත්
ගැස්සුනත්
හෙල්ලුනත්
බුලත් විඩට නැවැත්තුවත්

ගෙදරින් දුහුල් සරමට
දාගත්තු ටී ෂර්ට් කෑල්ලට
ඩක්කුවට නැග්ගම දාගන්න වෙන
තවත් දුඹුරු පාට ඕවර් කෝටයක්

නළලේ උනන දා බිඳු
දිවෙන් ලෙව කකා
උඹලයේ කුණු කතාත් අහගෙන
මම දත කාගෙන ඉන්නේ. . .
හවසට ගහන බාගේ මතක් කරගෙන.

Tuesday, January 19, 2010

එදා දවස උදා වේවිදෝ !


සිහින් තොල් පෙති පලාගෙන
පොලාපැනපු දත් ගෙඩි
සතුට,සොම්නස,ප්‍රීතියේ ගුණිතයක්
රාජ හිනාව වගේ

කවුරුත් එන්නැති
කවුරුත් දන්නැති
බිත්ති හතරක් මැද්දේට වඩා
වන දෙව්ලිය තුරුලේ
උකුල් තල පහස විඳින්න

අතට ගත්තු නෙක විසිතුරු
තාමත් රාක්ක උඩ වේලෙයි
කවදාහරි අරන් දෙන ලයිස්තුව
උස යන්නේ රියන් වලින්

ලෙක්චර්,පාඩං
විභාග,වයිවා
රස්සා වැඩ ගොඩ මැද්දේ
මගේ අනිත් එදා දවස. . .
මතුදා කවදාද?

Monday, January 11, 2010

හැටි


වැන්දා නොවැන්දා
මුවින් පිටවෙන බුදු සරණ
කටක් කාපං පුතේ. . .කටක්
දුවන්න දුවන්න. . .එලවං එන
ඒක ඉතින් ඔය ජාතියේ හැටි

මොකද ඔය කොන්ඩේ
පැයකට දෙපාරක් දොරට තට්ටු
කවද්ද විභාග
ඒක ඒ ජාතියේ හැටි

එනකං මගබලං
ඉන්නකං කන් පුරවන්
යනකොට ඇස් තෙත් කරං
පපුවට තුරුලෙන් ආසාවෙන්
ඒක මෙයාගේ හැටි

යමු එකට. . .එමු එකට. . .
ඉමු එකට. . .
අනිත් උන්ගේ ආදරේ දියර උනාට
මේ ආදරේ කුට්ටියක්
මගේ ආදර කුට්ටිය

අරයා. . .එයා. .මෙයා
ඇතුලේ ගැටි ගැටී
හුස්ම ගන්න එක
මගේ හැටි. . .

Friday, January 8, 2010

හොරකම


මතක ලක්ෂයේ ඉඳන්
දුරක් ඇවිද ගිහින්
අතගා පස්ස පැත්ත බැලින්
විදලා විදලා

හීනෙක තලු මරනකොට
ඇහිච්ච කම්මල් සද්දෙට
ඇහැරී බැලින්
බිඳලා බිඳලා

වැඩ පොට්ටනි ඉවරවෙලා
ගෙදරට බඩගාන වෙලේ
මයේ මාලේ අරූ අතේ
කඩලා කඩලා


කිරි අම්මට ජයසිරිමා බෝ වඳින්න
මයේ පොඩ්ඩිගේ හිත සැනසෙන චොකලට්ටුව
මුලු මාසෙම බජට් එකත්
ආර්ථිකේ මිටියෙන් කුඩු කරලා

අපිට මොන බෝධිද
උඹ සූප්පු කරහන් ලොසින්ජර පුතේ
විදපු,බිඳපු,කඩපු,ගහපු එකාවත්
බඩවල් පුරවන්නැති නෙව ඌ පැටවුන්ගේ!